देवकी कृष्ण मंदिर, माशेल

देवकी–कृष्ण मंदिरातील जन्माष्टमी: प्रत्यक्ष कृष्णजन्माचा अनुभव

देवकी कृष्ण मंदिरातील जन्माष्टमीचा उत्सव हा अत्यंत अद्वितीय असतो.

संध्याकाळ होताच मंदिर भक्तांनी भरून जाते आणि वातावरण भक्तिमय बनते. रात्री साधारण ८ वाजता कृष्णजन्माचे कीर्तन सुरू होते.

या उत्सवाची विशेष गोष्ट म्हणजे कृष्णजन्म फक्त सांगितला जात नाही, तर तो प्रत्यक्ष साकारला जातो.

पारंपरिक वेशातील एक पुजारी किंवा भक्त देवकीची भूमिका साकारतो. समोर अंतरपाट धरला जातो आणि मंगल मंत्रोच्चारांमध्ये प्रतीकात्मक कृष्णजन्म साजरा केला जातो.

अंतरपाट हटवताच भक्तांना देवकीच्या मांडीवरील बाळकृष्णाचे दर्शन होते. भक्त भारावलेल्या अवस्थेत असतानाच बाळकृष्णाला पाळण्यात ठेवण्यात येते.

त्यानंतर दोन पुजारी बाळकृष्णाला पाळण्याच्या वरून व खालून एकमेकांकडे देत “कोणी गोविंद घ्या, कोणी गोपाळ घ्या…” पारंपरिक स्वरात म्हणतात. त्यानंतर बाळकृष्णाला पाळण्यात घालून पाळणा हलवला जातो. हा प्रसंग पाहताना प्रत्यक्ष कृष्ण जन्म पाहिल्याची अनुभूती येते.

नंतर पुजारी बाळकृष्णाची मूर्ती प्रत्येक भक्ताच्या डोक्याला लावून आशीर्वाद देतात. एकूणातच अविस्मरणीय असा हा कृष्ण जन्माष्टमीचा सोहळा असतो.

हा केवळ उत्सव नसून आयुष्यभर लक्षात राहणारा आध्यात्मिक अनुभव असतो.