केरी बीच, देव आजोबा मंदिर-केरी गावचे सौंदर्य

उत्तर गोव्यातील एक शांत आणि सुंदर किनारी गाव–केरी

केरी नावाची गोव्यामध्ये तीन गावे आहेत. एक पेडणे तालुक्यात, एक फोंड्यामध्ये आणि एक बेळगावला जाताना चोर्ला घाट लागण्यापूर्वी येते ते सत्तरी तालुक्यातले केरी. तीनही गावे निसर्गरम्य आणि स्वतःचे वेगळेपण जपणारी आहेत.

यातील पेडणे तालुक्यातील केरी गाव हे महाराष्ट्र सीमेलगतअसून, गोव्याहून वेंगुर्ल्याला जाताना लागते.  सागरी किनारा लाभलेले हे शांत निसर्गरम्य गाव, कमी गर्दीचे पर्यटन स्थळ आहे.  केरीला जाताना वाटेत लागणारा निसर्ग, गोव्यातील वैशिष्ट्याने परिपूर्ण परंतु आता कोकण जवळ आला आहे ह्याचा आभास होणारी गावे प्रवासाचा आनंद द्विगुणीत करतात.

पेडणे तालुक्यातील हे केरी गाव विशेष प्रसिद्ध आहे ते केरी बीच आणि देव आजोबा मंदिरामुळे. इतर समुद्रकिनाऱ्याच्या तुलनेत अतिशय स्वच्छ आणि शांत असणारा बीच आणि बीचवरील देव आजोबा मंदिराचे पावित्र्य यांचा संगम इथे अनुभवायला मिळतो.

जर तुम्ही उत्तर गोवा फिरायला येणार असाल आणि पर्यटकांच्या गर्दीपासून दूर असलेला असा शांत आणि निवांत समुद्रकिनारा तसेच  समुद्रकिनाऱ्याजवळ एखादे मंदिर असा अनोखा संगम असलेल्या ठिकाणाच्या शोधात असाल तर पेडणे तालुक्यातील केरी त्यासाठी एक उत्तम पर्याय आहे.