हाऊसेस ऑफ गोवा म्युझियम, तोर्डा

हाऊसेस ऑफ गोवा म्युझियममधील पाहण्यासारख्या गोष्टी

पहिल्या मजल्यावर इ.स.पू. १३०० पासूनचा गोव्याचा इतिहास प्रसिद्ध व्यंगचित्रकार मारियो मिरांडा यांच्या रेखाटनांच्या माध्यमातून प्रदर्शित केलेला आहे. यामध्ये पोर्तुगीजांच्या आगमनानंतर गोव्याच्या स्थापत्यावर झालेल्या खोल आणि अपरिवर्तनीय प्रभावावर विशेष भर दिलेला आपल्याला दिसून येतो. त्याचबरोबर इथे गोव्यातील आठ घरांचे फोटो आणि माहितीसहित प्रदर्शन केलेले आहे. ती आठ घरे आहेत.

• सोलर लोयोला फुर्तादो – चिंचणी
• कासा दोस मिरांडाज – लोटली
• द राणे हाऊस -साखळी
• कासा दो गुदिन्हो जॅक्स – माजोर्डा
• देशप्रभू कासा दो होस्पेडेस, पेडणे 
• द नाईक हाऊस – मडगाव
• पॅलेसिओ सांताना द सिल्वा – मडगांव
• द फिगरेडो हाऊस – लोटली

दुसऱ्या मजल्यावर गोवन घरांमधील पारंपरिक वस्तू —ज्यामध्ये पेंटिंग्ज, अलंकार तसेच जुन्या घरांच्या वास्तूंचे काही भाग; जसे संपूर्ण कठडे, दरवाजांच्या चौकटी, मंगलोर टाईल्स, जांबा दगड, फर्निचर आदी पाहता येते.

तिसरा मजला, खुल्या सभागृहाच्या स्वरूपाचा आहे. इथे पोर्तुगीज बाल्कोआ, तुळशी वृंदावन, पारंपरिक गोवन दालने, लाकडी फर्निचर यांचे फोटो आणि माहिती पाहायला मिळते. बंद गच्चीप्रमाणे असलेल्या ह्या मजल्यावरून आणि दुसऱ्या मजल्यावर असलेल्या बाल्कनीमधून खालील रस्ता व सभोवतालचा निसर्गसुंदर परिसर न्याहाळता येतो.