श्री संस्थान गोकर्ण पर्तगाळी जीवोत्तम मठ

योग्य शिष्याचा शोध आणि विद्याधीश तीर्थ स्वामी

मठाच्या परंपरा पुढे चालवण्यासाठी, एक योग्य शिष्य म्हणून बटू शोधावा असे स्वामीजींच्या मनात आले; जो पुढे २४वे मठाधीशपद भूषवेल. त्यासाठी स्वामीजींनी शोध सुरु केला. इ.स. २०१४ च्या सुमारास त्यांच्या या प्रयत्नांना यश मिळाले. 

बेळगावमध्ये २०१२ साली झालेल्या चातुर्मासादरम्यान स्वामींचे लक्ष उदय भट नावाच्या एका बटुकडे गेले. त्याचा स्वभाव, वर्तन आणि धार्मिक मनोवृत्ती यामुळे स्वामीजी प्रभावित झाले. चातुर्मास संपेपर्यंत स्वामींनी आपली पसंती व्यक्त केली नाही. कारण त्यांना बटूच्या अध्यात्मिक ओढीबद्दल आणि वर्तनाबद्दल अजून जाणून घ्यायचे होते. कोणतीही गोष्ट पडताळून पाहण्याची स्वामींची विशिष्ट पद्धत होती. त्याप्रमाणे त्यांनी बटूची संपूर्ण वर्तणूक पडताळून पाहिल्यानंतर श्री रामदेव वीर विठ्ठलाच्या सेवेसाठी स्वतःला अर्पण करावे असा आदेश बटू उदय भट यास दिला. त्यावेळी महाविद्यालयीन शिक्षण घेत असलेल्या उदय भट शर्मा यांनी स्वामीजींचा आदेश मोठ्या आनंदाने स्वीकारला व श्री संस्थान गोकर्ण पर्तगाळी जीवोत्तम मठात श्री रामदेव, वीर विठ्ठल आणि स्वामीजींच्या चरणी स्वतःला अर्पण केले. अशा प्रकारे मठाची परंपरा पुढे चालवण्यासाठी योग्य शिष्य नेमण्याची स्वामीजींची इच्छा पूर्ण झाली.