खतखते 

गोव्याचा आणखीन एक पारंपरिक पदार्थ, खतखते! जे गोव्याबरोबरच; महाराष्ट्र, कर्नाटकातील सारस्वत कुटुंबात गणेश चतुर्थीला आवर्जून केले जाते. गणपतीचा तो आवडता पदार्थ आहे अशीही एक धारणा आहे. श्रावण महिन्यात मिळणाऱ्या, तसेच काही बारमाही मिळणाऱ्या विविध भाज्या घालून केलेली ही भाजी म्हणजे अवीट गोडीचा खास पदार्थ आहे. ह्यात घातलेल्या प्रत्येक भाजीची चव आणि वास ह्या भाजीला एक विशिष्ट चव प्राप्त करून देतेच पण त्रिफळ नावाचं गोवा आणि कोकण प्रांतात मिळणारं एक छोटंसं फळ जे मसाला म्हणून वापरलं जातं, त्याची चव आणि वास हे खतखत्याच्या अवीट गोडीचा राजा म्हणायला हरकत नाही. त्यामुळे खतखत्यामध्ये त्रिफळ हे असलंच पाहिजे.